headerphoto

Randopedia dans la région d’Agadir, 30 septembre -02 octobre 2011,

 
Photos
 
Par :  
Amina
 
 

الروندوبيا في بلاد العسل و املو


كان داك النهار 30 شتنبر 2011 وصلت البليصة ديالنا حدا معهد الحسن الثاني للزراعة و البيطرة مع ستة ديال لعشية (معطلة) و نا نلقى تقريبا كلشي حاضر، شي كيقلب على الما، و شي لاخر كالس في لميني بيس الحمد لله كلشي فرحان وضحكة ما خطات حد.
جلسنا في لميني بيس كل واحد فينا خدا بلاصتو و بدات رحلة ديالنا ها لكيضحك و ها لكيغني منهم انا ههه و كاين لنعس اما سي عبدو مخلاناش بلا مزيكا ما كاين غير الشرقي و الغربي و الشعبي و هاك بلاك....... وصلنا لمراكش مع حداش و نص ديال ليل باش نتعشاو و يا ســـــــــــلام على العشا، كلشي شد بلاصتو شي  كيضحك، شي كيهضر،  و شي قالبها تقشاب و كملات مني حطو برارد ديال اتاي، و يا ســـــلام اتاي و اشمن اتاي، تعشينا و كملنا طريقنا لايموزار اداوتنان، لوصلنا ليها خمسة ديال الصباح يوم 1 اكتوبر 2011،  كان البردددددددددددددددددد، نزلنا من لميني بيس كل واحد فينا هز صاكو فوق ظهرو و دخلنا الجيت باب ايموزار ايدوتنان ليلقينا جوج بنوتات من اكادير سبقونا ليه.

بدا سي عبدو كيقول لبنات لبيوت الفوق الدراري هبطوا التحت ما تنساوش الفياق مع 8 ديال الصباح لفطور و انشاء الله نبداو الرحلة ديالنا الى بحيرة. و داكشي لكان مع 8 ديال الصباح كلشي كان فايق و دراري كانوا سابقينا وكيعموا في لابيسين فطرنا مجموعين بعسيلة و املو و زويتة بلدية و اركانية،

 


سالينا الفطور،  كل واحد فينا هز قرعة ديال الما و الصوندويتش، تجمعنا كاملين حدا الجيت و منها بدات الرحلة ديالنا.

 


الحداش و نص بدات الرحلة ديالنا، كان معانا المرشد جيمي اللي فين ما يسمع شي طونوبيل جاية كيبدا يقول بالشلحة "اغراس اغراس" لكتعني الطريق، كملنا الطريق ديالنا على الشانطي شوية هبطنا بين الحجر و هنا بدا المعقول ماكين غير حظي راسك لا طيح

 


شوية وصلنا لهاد الجريدة، صراحة كتنسى راسك فيها بكثرة ما كاين السكات و دنيا هادية، و هنا بدا الرايس ديالنا سي جمال كيقول يلاه تجمعوا غادي نتصوروا حدا هاد النخلة، كلشي تجمع حداها  و خدينا هاد التصويرة الروندوبيدية


العائلة الروندوبيدية على جدع نخلة
كملنا طريقنا ضاحكين ناشطين حتى وصلنا للبحيرة، دراري متيقوش غير شافو الما و بدا واحد من مور واحد كيتلاحو فيه مكاين غير اوبلا ارا برع هههه، سبحان الله المنظر، الطبيعة روعة كتنسى فيه راسك

 

 

دراري حيحوا مزيــــــــــــــــــــــــــان و التصويرة راه باين فيها كلشي، انا بعدا كنت باغا نعوم ههههه و يارتني مفكرتي فيها ههههههه حيت مني قلت ليهم بغيت نعوم لقيت راسي وسط الما ههههههه و الواعرة هي مني ملقيتش الحد تخلعت و انا نزيد نهبط ههههههه الحمد لله ربي دار لي فيها الخير عتقوني هههه.
جا وقت الماكلة هههههه عبدو قالينا يلاه غادي نبداو الماكلة مع جوج و ربع غادي نتحركو من هنا، كتشوف كلشي جبد لصوندويتش و قرعة الما دياولو و كلشي كايكل و سكــــــــــــــــــــات و سي عبدو كيقولينا متلوحوش الازبال في الارض باش منلوتوش الطبيعة.

وصلات الوقيتة باش غادي نتحركو و هنا بدا الصح، بدينا التوغل بين الجبال، تفرقنا لثلاثة ديال فرقات، الفرقة الاولة رجعات من بعدما خرجنا من البحيرة كاين لي عيا و مقدرش يكمل و رجعوا، الفرقات جوج لاخرين كملوا الطريق بين الجبال من حتى وصلنا لهاد البلاصة

 

جلسنا فيها شوية حتى رتاحينا و من بعد تفرقنا، الفرقة لكنت فيها انا راجعنا من طريق اخرى، اما الفرقة الثالثة و لي تقريبا كانت كلها فيها دراري الا بنت وحدة مريم كملات التوغل مع المجموعة الثالثة و طلعوا في الجبال اما حنا رجعنا من طريق اخر حتى وصلنا لجيت الفرق بينا و بين المجموعة الثالثة كان نص ساعة من بعد ما وصلات الفرقة الثانية.
كلشي وصل لجيت مسخسخين، مدكدين، دوشنا و هبطنا ناكلو زويتة و عسيلة و كاس ديال اتاي ههههه داكشي واعرررررر و ما تسخاش من املو و لعسل هههه

 السهرة قربات تبدا، كراسي تقادو، ديدجي خدام كيقاد المسائل ديالو مع عادل، جمال، عبدو و ياسين، تجمعنا و هنا بدات سهرة، كان سي جمال الرايس ليعطى الكلمة الولة كيشكر فيها كلشي و خصوصا سي عبدو على المجهودات الجبارة ليدار باش ينظم هاد الخرجة ديالنا، من بعد جا عادددددددددددددل و ليدار لينا كوووووووويز هههههه صراحة تهلا فينا مزيان بالاسئلة ما كاين غير شنو كتعني اغادير، شحال سكان اكادير، فوقاش تبنات اكادير.........تسلات بروميار ميطة و مشينا نتعشاو، يا سلام طواججججججججججججن ويلي ويلي اشمن مذاق و اشمن طياب الله يعطيهم الصحة تعشينا و رجعنا للسهرة ديالنا ليكانت مزال ما كملات ههههه بدينا بكراوكي هههههه و اصوات الرائعة بدات كتبان، ما كاين غير جورج وسوف، اصالة، عبد الحليم، ......صراحة كانوا الاصوات واعرة بزاف، رجعنا لدوزيام ميطة ديال الكويز هههه و لي سلا بفوز مجوعة اخوان شفق،

 


تفرقوا الجوائز على الرابحين، رجعنا لكراووكي لكان دويتو بين مريم و ابراهيم هههههه ابراهيم كيغني و كاطو ديال عيد ميلاد ديالو جاي

 

 و اوبلللللللللللللللللللللللللللا عيد ميلاد سعيد، ابراهيم فرح و الفرحة بانت عليه، مفاجاة واعرة و ماكنتش على البال كلشي كيغني عيد ميلاد سعييييييييييييييد ابراهيم و فرحانين بيه و الواعرة هي مني هزوه خواو ليه جياب وكانوا غادي يرميوه في لابيسين  ههههههه المهم داز العيد ميلاد غزااااااااااااااااال بلاسمتكم و العقبال عندكم انشاء الله.
الحفلة تسلات و جا وقت النعــــــــــــاس، قبل ما نمشيو تقرر اننا الصباح قبل ما غادي نفطروا خاصنا نخرجوا لصاك ديالنا و نحطوهم في ليمني بيس، و داكشي ليكان مني فقنا الصباح، فطرنا و بعد شدينا الطريق لاكادير و ليكان زوين في الرحلة هو احترام الوقت يعني الى تقال خصنا نفطروا مع 8 كلشي كيكون حاضر، ماعلينا، كملنا طريقنا لبحر ديال اكادير، وصلنا في الوقت، زعما الوقت هو الوقت ما كاينش تعطال هههه، المهم وصلنا لمارينا و هنا تفرقنا، كاين ليمشى في الباطو بحال انا ههه و كاين ليرجع  المدينة و السوق ديال اكادير، كملنا الرحلة ديالنا  على الباخرة، صـراحـــــــــــــة النزهة عبر البحر دازت زوينـــة، كتنسى العالم و لي فيه، في البداية كلشي جالس و كيتمنظر، شوية كتشوف  شي نعس و شي مش كيصيد الحوت ههههههه و شي هبط يعووووووووووووم، 



4 سوايع و حنا كنتزهو في البحر و من الزهر لعندنا الحمد لله، ما كانوش الامواج ههههههه، رجعنا لبر الامان و لقينا ليمشاو المدينة رجعوا و جالسين كيتسناو فينا تجمعنا كاملين و مشينا تغدينا ما كاين غير طواجن الدجاج و اللحم (نسيت مني كنا غادين النهار الاول ههههه ميني بيس لكنت فيه، فرق علينا عبدو ورقة باش نكتبوا شنو نكالو في الغدا ديال نهار الاحد هههههه منعرف شكون لكتب طجين دجاج بكري ههههه و ليباغي الدجاج هبط عليها بلما يشعر ههههههه)، شدينا الطريق باش نرجعوا الرباط ان شاء الله وصلنا لواحد محطة الاستراحة تسلمنا مع الناس ديال الدار البيضاء و كملنا الطريق ديالنا ناشطين و ضاحكين حتى وصلنا بخير و على خير.
الصراحة الرحلة دازت واعرة بجهــــــــــــــــــــــــد، كلشي كان مقاد مزيان، كان احترام الوقت، الحمد لله مكان حتى شي مشكل، كلشي كان فرحان و كلشي عجباتو التسافرة ههههه و العقبال الجايات ان شاء الله.
باسمي و باسم جميع الروندوبيين و الروندوبيديات كنحيي و كنشكر كل من :
- الرايس جمال و سي عبدو على المجهودات الجبارة لي قاموا بها باش ينظموا لينا الخرجة الواعرة ههه.
-سي عادل لي نشط لينا و نظم لينا السهرة و ليعاونا في كراووكي (صراحة تبارك الله على الصوت ديالو)
- سي ياسين المصور ديالنا و لي التسافيرة كاملة و هو كيصور فينا حتى مني كان كيعوم ههههه.
-ديدجي جلال و لي كان ليه دور كبير في السهرة و كذا العيد الميلاد

- و اخيرا كنشكر الجميع على الحضور ديالهم، الضحكة لي الحمد لله ما خطات حتى واحد فيهم، الصراحة شابو للناس القدام و لجداد منهم انا هههه عرفنا كيفاش نتاقلموا مع بعضياتنا الحمد لله و كتنمى نتلاقو في الرحلة الجاية انشاء الله